Өдөр тутмын будалтыг бид бараг л суурь крем түрхэж, хөмсгөө хальт тодруулчихад л болчихдог будалт гэж ойлгодог. Гэвч яг үнэндээ энэхүү будалт маань гоёлын будалтаас ч ялгаагүй техник шаарддаг будалт юм шүү дээ. Өнөө цагт эмэгтэй хүний үзэсгэлэн гоог илүү тодотгох олон сайхан бүтээгдэхүүн гарчихсан байхад дан ганц крем түрхээд л гарчихвал будаггүй байхаас ялгаа юун. Тиймээс илүү сайхан үзэсгэлэнтэй харагдахын тулд эдгээр аргуудыг будахдаа ашиглаарай.

Суурь

Натурал будалт хийх үед суурь бүтээгдэхүүн хамгийн чухал үүрэг гүйцэтгэдэг. Учир нь энэ төрлийн будалтыг хийхэд суурь нь хөнгөн, зөөлөн байхаас гадна арьс чийгшилтэй байвал будалт төгс болох бөгөөд:

• Чийгшүүлэгч lotion

Өдөр тутмын,  натурал харагдуулах будалт хийхэд чийгшүүлэгч lotion хамгийн тохиромжтой байдаг хэдий ч бид ихэвчлэн хүнд бүтэцтэй тос хэрэглэдэг нь алдаа болдог. Хөнгөн суурьтай арьс нь илүү зөөлөн харагддаг бөгөөд будалт хийх явцад арьс хэт хуурай эсвэл зузаан харагдуулдаггүйгээрээ онцлогтой.

• Шингэн энгэсэг

Хүн хүний арьсны онцлог өөр учир аль болох өөрт таардаг шингэн энгэсгээ л түрхээрэй. Гэхдээ хөнгөн мэдрэмж төрүүлэхээс гадна хагас матт байвал өдрийн турш будалт тань удаан тогтох болно.

 

Хөмсөг

Нүүрний хэлбэрийг зөв харагдуулах хамгийн чухал хэсэг нь хөмсөг байдаг. Хөмсгөө зассан болон засаагүй, тодруулж будсан болон будаагүй хөмсөгнүүд тэнгэр газар шиг ялгаатай байдаг гэдэгтэй бүгд санал нийлэх байх. Тиймээс хөмсгөө илүү натурал харагдуулахын тулд:

• Хөмсгөө хэлбэрийн дагуу засах. Хэт нарийн болголгүй, ургалтын дагуу засвал илүү натурал харагдана.
• Байгалиасаа хөмсөгтэй харагдахын тулд гүн бор болон хар саарал гэх мэт завсрын өнгөтэй, нарийн гаралттай бүтээгдэхүүнийг ашиглаарай. Илүү натурал, үстэй мэт хөмсөг зурагдах болно.
• Хөмсөгний багсаар сайтар самнавал хөмсөг нь илүү ширхгийн дагуу, цэвэрхэн, цэгцтэй, хэлбэртэй харагддаг.

Нүд

Нүдээ хэчнээн хичээж будсан ч өдрийн турш байсан будалт шингэж алга болох эсвэл давхраа наачихсан мэт зураастай болж харагдах, бүтээгдэхүүний гаралтаас шалтгаалж будалт алдаатай болох тохиолдол бий. Уул нь хамгийн гоё харагдах ёстой зүйл нь мэдээж нүд шүү дээ. Тиймээс будалт хийхийн өмнө нүдний base түрхвэл, түрхэж буй тенийн өнгийг тод, яг өнгөөр нь гаргаад зогсохгүй, нүдний тенийн зовхинд шингээлгүйгээр анх түрхсэн хэвээр нь өдрийн турш байлгадгаараа онцлогтой.

Гэрэл сүүдэр

Натурал будалт хийх явцад бүх будгийн гаралт зөөлөн байх учир царай илүү хавтгай харагдах сул талтай. Тиймээс гэрэл сүүдэр ашиглан царайны төрхөө зөв харагдуулахын тулд:

• Хэрэв та шингэн энгэсгийн ардаас гэрэл сүүдэр хэрэглэдэг бол тосон бүтэцтэйг...
• Хуурай энгэсгийн ардаас гэрэл сүүдэр хэрэглэдэг бол хуурай бүтэцтэйг сонгон хэрэглээрэй. Мөн хэт тодруулалгүй, завсрын өнгөтэй сүүдэр болон үл мэдэг саатай гэрэл ашиглавал илүү үзэсгэлэнтэй, натурал харагдахаас гадна, арьс тань зүгээр л гэрэлтэх болно.

Хацар өнгөлөгч

Байгалийн, зөөлөн, гэрэлтсэн төрхийг бий болгохын тулд хацар өнгөлөгч нь хөнгөн, зөөлөн харагдах ёстой. Хэт тод, хурц өнгийн хацар өнгөлөгч хэрэглэвэл будалт хиймэл харагдахаас гадна огт хэрэглэхгүй бол царай бүр гундуу, өвдсөн мэт харагдах магадлалтай. Тиймээс хацар өнгөлөгчийн сонголт нь таны арьсны өнгө болон будалтын нийт өнгөтэй зохицсон байвал хамгийн сайн үр дүнтэй.

• "Будаагүй мэт" будалтад тохирох өнгө нь зөөлөн, байгалийн өнгө байдаг. Жишээ нь завсрын, хөнгөн харагдахуйц эсвэл зөөлөн ягаан өнгөнүүд хамгийн тохиромжтой. Эдгээр өнгөнүүд нь арьсыг илүү байгалийн, эрүүл харагдуулахаас гадна өхөөрдөм харагдуулдгаараа онцлогтой.

Будалт бүр өөр өөрийн өнгө төрхтэй. Тиймээс өдөр тутамдаа өөрийн дүр төрхөө зөв цэгцтэй харагдуулах хөнгөн будалтыг хийж, энгийн атлаа төгс, төрөлх гоо үзэсгэлэнгээ илүү тодруулаарай.