Эрс тэс уур амьсгалтай, 4 улирлаар өөрчлөгдөж байдаг бүс нутагт амьдарч буй бидний хувьд хамгийн халуун үе болох аялал зугаалгын улирал нэгэнт иржээ. Тэгвэл энэ зун арьсаа арчлахад зайлшгүй мэдэх шаардлагатай зөвлөгөөг танд хүргэе. 

Яагаад бидэнд өвөл, зуны өөр өөр арьс арчилгаа хэрэгтэй вэ? 

Бид улирал солигдох бүрд хувцасны шүүгээгээ шинэчилж, шаардлагагүй хувцаснуудаа далд хийдэг. Өвлийн хүнд, өтгөн бүтэцтэй, олон төрлийн орц найрлага агуулсан чийгшил өгөх бүтээгдэхүүн нь зуны улиралд тийм ч их шаардлагагүй юм. 

 1. Зуны арьс арчилгааны хамгийн чухал зүйл бол мэдээж НАРНЫ ТОС

SPF хамгаалалт. Зуны улиралд нар илүү хурц тусаж, өдөр илүү уртсаж мөн хөдөө, гадаа аялж зугаалах нь ихэсдэг. Энэ үед өндөр хамгаалттай SPF50+ PA++++ нарны тосоор арьсаа хамгаалснаар нарны хэт ягаан туяаны хортой нөлөөнөөс хамгаална. Нарны хэт ягаан туяа нь арьсыг хуурайшуулж, хөгшрөлтийг түргэсгэж арьсыг гэмтээж байдаг. 

Багахан хэмжээний нарны тосыг өглөөдөө нүүр болон хүзүү зэрэг нарны тусгал хамгийн их тусдаг хэсэгтээ 2-3 цаг тутам сэргээж түрхэх хэрэгтэй. 

  2. Цэвэрлэгээ

Зуны улиралд хүний арьс илүү их хөлс, усыг ялгаруулж байдаг ба энэ нь бохирдол өөртөө хуримтлуулах нөхцөл болж байдаг. Оройдоо давхар цэвэрлэгээ буюу нүүрний будгаа өөрт тохирсон арилгагчаар сайтар цэвэрлэсний дараагаар угаагч ашиглаарай. 

Тосон бүтэцтэй цэвэрлэгээний бүтээгдэхүүнүүд нь зуны улиралд хэрэглэхэд хүнд мэдрэмж төрүүлэхүйц, арьсны тэнцвэрийг алдагдуулж болзошгүй. Тэгвэл зуны улиралд угаагч болон усан цэвэрлэгчийг санал болгож байна. 

Цэвэрлэгээг алгасаж нэг өдөр л будагтайгаа унтах нь хөгшрөх явцыг хурдасгаж байдаг тул өдөр бүр цэвэрлэгээг бүү алгасаарай. 

3. Хөнгөн гуужуулагч 

Илүүдэл бохирдол, тос, үхэжсэн арьс зэргийг өөрт тохирсон гуужуулагчаар 7 хоногт нэгээс хоёр удаа гуужуулснаар эрүүл, толигор байдлаа хадгалж үлдэхэд туслах болно. 

  4. Чийгшүүлэх олон төрлийн маск

Олон төрлийн өөрт тохирсон салфеткан маскуудыг энэ зун хэрэглээрэй. Тосон суурьтай биш усан суурьтай хөнгөн мэдрэмж төрүүлэхүйц өөрийн арьсанд тохирох чухал орц найрлагыг агуулсан эмчилгээний болон өдөр тутмын салфеткан маскууд нь хэдхэн минутын дотор шаардлагатай үйлчилгээг үзүүлэх боломжтой. 

  5. Серум 

Арьсны онцлогоосоо хамаараад өөрт шаардлагатай үйлчилгээг өдөр тутамдаа авах боломжийг серум нь олгодог. Серум нь тонертой харьцуулахад илүү өтгөн бүтэцтэй ба хэд хэдэн серумыг давхарлаж түрхсэн ч болдог.